2015-ci ildə Heydər Əliyev Fondunun təşəbbüsü və dəstəyi ilə “Təmiz Şəhər” ASC tərəfindən "Qala" Dövlət Tarix-Etnoqrafiya Qoruğunun ərazisində “Tullantıdan Sənətə” muzeyi yaradılıb. Hazırda muzeydə 180-ə yaxın müxtəlif sənət nümunəsi var. Onlar plastik su qabları, sellofanlar, uşaq arabası, oyuncaqlar, müxtəlif maşın hissəcikləri, siqaret kötükləri, tennis topları, insanların lazımsız hesab etdiyi digər tullantı materiallarından hazırlanıb. Muzeyi gəzdikcə dəmir parçalarından düzəldilən "Simurq" quşunu, taxta tullantılardan yaradılan at fiqurlarını və digər bu kimi sənət əsərlərini burada görmək mümkündür. Bu nümunələrin yaranması üçün əsas xammal kimi tullantılardan istifadə edilib. “Tullantıdan Sənətə” muzeyi yerli sənətkarlarla yanaşı, dünyanın müxtəlif ölkələrindən olan sənətkarların əsərlərini özündə birləşdirməsi ilə diqqəti cəlb edir.